Jæja, nú ætla ég að gefa mér smá tíma til að blogga.  Skólinn er byrjaður og hann hefur haft forgang, svo að ýmislegt annað hefur setið á hakanum, s.s. að klára innréttinguna, en það sem er eftir er að setja sökkulinn, tengja viftuna og ljós undir skápunum og síðast en ekki síst að flísaleggja milli borðs og skápa, sem ég ætla að spreyta mig á sjálf.  Ég er búin að skella inn nokkrum myndum á flickr síðuna mína, það er hlekkur á hana hérna vinstra megin, þar sem stendur ,,Myndasíðan mín" og þar getið þið séð þetta í þróun. 

Ég fór með drusluna mína í skoðun í gær og krossaði fingur, en hún fékk fulla skoðun blessunin og ég þurfti ekki að ýta henni út eins og sumir hehe. 

Ég held annars uppteknum hætti frá í fyrra og ferðast með strætó í skólann og það er það að frétta af Glanna glæp sem ég skrifaði um í fyrra að hann er enn að keyra strætó, en er orðinn öllu rólegri og yfirvegaðri en hann er einn af mjög fáum vagnstjórum sem heilsa alltaf brosandi.

Jæja, ég læt þetta nægja að sinni og ætla að fara að koma mér í háttinn.